Универзитетскиот професор и поранешен амбасадор на Македонија во ЕУ, Блерим Река на неговиот профил на Фејсбук ја потврди веста која утрово се објави на неколку портали на албански јазик, дека ќе поднесе кандидатура за претседател на државата. Магазин, од извори во БЕСА, дознава дека пред два дена професорот Блерим Река имал заедничка средба со Зијадин Села и Билал Касами, каде им ја најавил својата кандидатура како натпартиски кандидат за претседател, а од нивна страна било изразено расположение за поддршка на кандидатурата. Села и Касами особено го ценеле придонесот што амбасадорот Река го дал за евро-интеграциите и на Македонија, но и на Косово.

Професорот Блерим Река од Јуни 2006-2010 беше амбасадот на Македонија при мисијата на ЕУ во Брисел, тогаш по предлог на ДУИ, а со акредитиви одобрени од Бранко Црвенковски, како тогашен претседател на државата. Во мандатот на амбасадорот Блерим Река се постигнаа два значајни исчекори за Македонија и тоа, препораката за почеток на преговорите од Европската Комисија во 2009-та, како и визната либерализација за граѓаните со македонски пасош во однос на Шенген зоната на државите членки на ЕУ. Исто така oд 2011-13 година амбасадорот Река бил правен советник на Претседателот на Косово и на Комитетот на за надворешна политика на косовскиот парламент, на теми поврзани со ЕУ-интеграциите, ИПА-фондовите и визната либерализација. Важи за умерен дипломат, со добри познавања за регионот и за ЕУ, но исто така и за добар публицист и истражувач во академската заедница, особено на темите поврзани со европските интеграции и регионалната соработка. Не е член на ниту една политичка партија, а како дипломат и академик има многу добар углед кај меѓународната заедница.