Откако матичната партија на Стојчев, СДСМ, побара негова оставка и најави негово бришење од членството, поранешниот градоначалник доби и ослободителна пресуда како “награда”.

Кривичиот совет при Основниот суд во Струмица го одби барањето на обвинителството Струмица, градоначалникот на Ново Село, Боро Стојчев, да се упати на издржување казна затвор од две години за кривично дело, за кое бил осуден во 2015 година.

Барањето е отфрлено како недозволено, бидејќи не постоела посебна постапка за отповикување на ново дело.

Тоа можело да се направи само за време на постапката која се водела против него за кривичното дело обид за шверц на цигари, информираат од струмичкиот суд.

На одлуката на Кривичниот совет на Основниот суд во Струмица, Основното јавно обвинителство има право на жалба до Апелацискиот суд во Штип во рок од три дена.

Градоначалникот Стојчев претходно со писмено обраќање го информираше Советот на Ново Село дека поднесува неотповиклива оставка од морални причини.