Македонскиот премиер Зоран Заев, во синоќешното интервју за регионалната ТВ Н1, во емисијата Пресинг, изјави дека не очекува да ја добие Нобеловата награда за мир, додавајќи дека самата номинација е афирмација на Република Македонија.

Премиерот го објасни процесот на постигнувањето на Преспанскиот договор, уставните измени во Скопје и ратификацијата во Атина, на гледачите во регионот им објасни дека со Грција не се преговарало околу идентитетските прашања и дека останува националниот идентитет на Македонците како Македонци кои говорат македонски јазик, со своја традиција, историја.

Тој рече дека САД И земјите од ЕУ имале исто така пресудно влијание и одговорност за постигнувањето на договор со Грција.

„Кога станав премиер, Македонија беше во кавга со сите наши пет соседи, а веќе денес немаме отворени билатерални прашања со соседите, остана само прашањето за црквата, но и за тоа веќе се преземаат одредени чекори, изјави премиерот Зоран Заев.

– Еве сега по постигнатите договори со Бугарија и со Грција, на последниот министерски состанок на ЕУ, најголеми поборници за Македонија и за Албанија да добијат проектиран датум за почеток на преговорите, беа токму Бугарија и Грција – изјави Заев.

– Ние кон крајот на февруари ќе ја добиеме столицата во НАТО, а полноправно членство по ратификација во парламентите на земјите членки на НАТО, кон крајот на оваа или на почетокот на идната година – рече премиерот.

Тој додаде исто така дека поради членството во НАТО, Русија се спротивставува за постигнатиот договор со Грција. Рече дека Македонија сака добар однос со Русија и се надева дека ќе се унапреди тој однос.

– Западот е присутен во Македонија уште од поранешна Југославија, со милијарди евра помош, но одлуките ги носиме ние. Русија е наш пријател, како што ни се пријатели и САД и ЕУ, но ние ги носиме нашите одлуки. Русија е против проширувањето на НАТО и тука е проблемот.