Христијан Мицкоски, лидерот на ВМРО-ДПМНЕ, во дебатата на „Клик Плус“ на ТВ21 истакна дека кога би бил премиер нема да го користи новото уставно име на Македонија дури и по цена „да му го одземат мандатот“.

Нема да ја користам придавката на новото уставно име на Македонија па ако сакаат и нека ми го одземат мандатот – рече Мицкоски запрашан за тоа како би постапувал доколку би ја водел идната македонска влада.

Лидерот на ВМРО-ДПМНЕ уште еднаш порача: Ова е Македонија, јас сум Македонец и земјата ќе ја наречувам Македонија.

Јас во Армијата, во гардискиот баталјон, сум се заколнал дека ќе ја бранам независноста и суверенитетот на Република Македонија. Тоа е мое право. Дали некој оваа држава ќе ја нарекува Марс или некако како вие што кажавте, тоа е негово право. Има органи во оваа држава, нека се позанимаваат. Ако грешам, нека дојдат и нека ме уапсат. Нека ме казнат, но тоа е мое право, порача Мицкоски.

На сугестијата дека треба да се обиде да привлече гласови и од албанската етничка заедница за претседателските избори како што тоа наводно го направил претходниот претседател на ВМРО-ДПМНЕ, Љубчо Георгиевски, во случајот со Борис Трајковски, Мицкоски рече дека нема намера да тргува со албански гласови преку партии од албанскиот политички блок.