Во силниот земјотрес и цунамито што во петокот го погодија индонезискиот остров Сулавеси, според последните податоци, загинаа најмалку 1.450 лица.

Информацијата за медиумите ја соопшти портпаролот на Националната агенција за справување со катастрофи на Индонезија, Сутопо Пурво Нугрохо.

Најголемиот број од жртвите се од градот Палу и од соседното место Донгала.

Според Нугрохо, досега се погребани само 519 од загинатите лица.

Во земјотресот беа уништени повеќе од 65.000 објекти, а раселени се повеќе од 60.000 луѓе на кои им е неопходна помош.

Во меѓу време, индонезиските власти распоредија дополнителни припадници на безбедносните сили во Палу, со цел да ги штитат клучните инфраструктурни објекти, како аеродормот, и да спречат кражби.

Палу денеска ги посети и индонезискиот претседател Џоко Видодо, која нагласи дека во погодените подрачја пристигнуваа помош од странство.

Најмалку седум карго авиони утрово слетаа на аеродромот во Палу носејќи повеќе тони хуманитарна помош. На авионите пишуваше „Помош за претседателот на Република Индонезија“.

Пет дена по катастрофалниот земјотрес и цунамито, еруптираше и вулканот Сопутан, кој се наоѓа во северниот дел на островот, на околу 600 километри североисточно од Палу.