Притворање пред изрекување на пресудата значи дека таа е донесена и дека е драконска, вели адвокатот Сашо Дуковски, кој го застапува поранешниот директор на БЈБ, Митко Чавков, во случајот за „27 април“. 

Според Дуковски мерката притвор е донесена затоа што веќе е одлучено и за пресудата. Тој прогнозира дека Чавков ќе добие затворска казна од над 14 години.

-Затоа овие правни гимнастики со определување притвор два дена пред изрекување на казната – вели Дуковски за „Телма“.

-Некаков си близок пријател на г. Чавков му кажал сосема случајно на некојси припадник на единицата „Алфи“, дека Митко Чавков има вила на Халкидики, не во Република Грција него во Халкидики, па се спремал да избега. Сето тоа е на 12-ти денеска и експресно врз основа на службена белешка, значи без никаква реална околност, било каков обид за бегство или нешто друго да е направено, туку врз основа на службена белешка која за судот беше доволна да определи притвор. Она што е многу битно да се потенцира, Митко Чавков беше на слобода со прифатена гаранција од 600.000 евра, не во пари туку во недвижнини, на членови на неговото најблиско семејство. Дали некој нормален може да смета дека тој ќе се даде во бегство и ќе ги остави неговите најблиски на улица- вели Дуковски.