Предлог закон за покачување на платите на вицепремиерите за 8.000 денари кој беше доставен до Собранието на РМ кон крајот на месец декември 2018 година, ќе се гласа во понеделник.

Доколку предлог законот помине во Собранието на Република Македонија, вицепремиерите Кочо Анѓушев, Лика,Османи, Шекеринска и Оливер Спасовски, веќе од февруари месец оваа година ќе имаат покачени плати.

Радмила Шекеринска, Оливер Спасовски, Бујар Османи, Кочо Анѓушев и Хазби Лика ќе добијат плати повисоки за 8.027 денари.
Тоа значи дека ќе се одлеат 481.620. денари од парите на граѓаните.

Платите на министрите се објавени на сајтот на владата, преку алатката за отчетност. Примањата на другите министри минатиот месец се движеле од 70.994 денари, колку што земал министерот без ресор задолжен за подобрување на статусот на Ромите Аксел Ахмедовски, до 80.206,00 денари, колку што му се исплатени на вицепремиерот за економски прашања Кочо Анѓушев.

Со измени на Законот за плати на избрани и именувани функционери, платите на вицепремиерите наскоро треба да се изедначат со тие на другите министри, согласно со одлуката на Уставниот суд од пред неколку месеци. Минатиот месец, вицепремиерката и министерка за одбрана Радмила Шекеринска земала плата 79.150,00 денари, а на вицепремиерот за Рамковен договор Хазби Лика, и покрај информациите дека не оди на работа, му се исплатени 76.340,00 денари или нешто повеќе отколку на вицепремиерот за европски прашања Бујар Османи, кој земал 75.635,00 денари.