Додека јавноста се замајува со „муабетите„ од типот што имал Груевски за доручек во Будимпешта или  дали пак  Фросина Ременски и Елизабета Канческа ќе се усогласат за законот за селективна амнестија, во СДСМ на големо се одвива озбилна внатрепартиска борба, за превласт во владата.

Во понеделникот вечерта во седиштето на СДСМ на улица Павел Шатев (некогашна Бихаќка) се одржал состанок на кој присуствувале Заев, Шеќеринска, Оливер Спасовски, Миле Зечевиќ и Кирацовски. Тема на разговор била бројката од 2/3 мнозинство за смена на уставот, што од ветеното може, а што мора да се исполни за да се задржат 8-те пребегани опозициони пратеници, кога во Јануари да се темпира гласањето за конечна смена на уставот и како да се настапи на претседателските избори.

Заев најмногу се задржал на проектот смена на уставот, задржување на мнозинството и известил за средбата што тој во Струмица на таа тема ја имал со Никола Тодоров и Митко Јанчев, градоначалникот од Кавадарци. Интересно е притоа што Шеќеринска се надоврзала на излагањето, со тоа дека процесот на уставни измени го смета за апсолвиран,  и дека истиот ќе се заврши според планот, но дека за неа е поважно овој период да се искористи за подготовка, за настап на СДСМ на претседателските избори во Април 2019-та година.

Таа притоа, не пропуштила прилика да истакне дека она што таа го слуша од дипломатите и од политичарите Албанци во Македонија е дека Заев е најсоодветното решение за консензуален кандидат на СДСМ и ДУИ за претседател на државата. Самиот Заев и Оливер Спасовски биле воздржани околу оваа констатација, а Заев пак рекол дека не треба да се брза и дека има уште време да се донесе конечната одлука.

Во СДСМ, според нашиот извор, не е тајна дека Шеќеринска навива за таков исход во кој Заев ќе истрча за претседателски кандидат, со големи шанси за победа, а таа да го превземе премиерското место во владата. Но, проблемот е во тоа што Заев има поголема доверба во Оливер Спасовски, отколку во Шеќеринска.

Токму овој момент влијае на жестокиот притисок во јавноста врз министерот Спасовски, од кого лично се бара да понесе одговорност и да си даде оставка заради неговата премолчена согласност или неспособност да го спречи бегството на Груевски. Впрочем, доколку добро се следат медиумите лесно е да се забележи дека токму телевизиите и портали блиски до СДСМ, особено новинари и аналитичари блиски до Шеќеринска, ја пласираа тезата дека министерот Спасовски или знаел или требало да знае за планот “Будимпешта“. А штом знаел, значи било договорено, а штом е договорено со Груевски, нема друго освен оставка на Оливер Спасовски, што би било и крај на неговата политичка кариера.

И така секој ден, не случајно, еднаш се праќа пораката преку Борјан Јовановски, па потоа преку Сашо Орданоски, па после долга хибернација се јавува Уранија Пировска, па се јавува поранешниот началник во МВР Трпе Стојановски кај Сања Васиќ на Телма, и кој знае уште кој се ќе се истакне во следниве денови и недели. И добро е да се лоцира одговорноста, особено во однос на Спасовски, но зад овие медиумски дебати исто така добро е да се знае дека на крилото на Шеќеринска во СДСМ, не му е дојдено до принципот на одговорност, туку до користење на шансата од политичката сцена да се тргне единствениот внатрепартиски конкурент на Радмила.

Не случајно во овој момент Телма излегува и со анкети за политичарите во Македонија, на кои се потенцираат две работи за Заев: прво, дека вкупниот рејтинг му е во благо опаѓање, и второ, дека кај гласачите Албанци е неприкосновено популарен, дури повеќе и од Ахмети и од Села. На тој начин се создава атмосфера дека Заев е тој од кој што треба рационално да одлучи и да влезе во претседателската изборна трка. За Заев да разбере подобро, дел од соработниците, меѓу кои и блиски луѓе на Шеќеринска, го убедуваат Заев дека тоа е за него одлична прилика за достоинствено повлекување од фронталната политика во која влезе многу ризично, со сомнителни разузнавачки материјали, но и со многу неостварливи ветувања, за кои, доколку биде избран за претседател, нема да мора да се правда пред граѓаните зошто не ги исполнил.

И дотука, што би рекол Заев, има дијалог. Но, кој би седнал на премиерската фотеља, дали Шеќеринска или Спасовски, останува еден голем камен на сопнување. Шеќеринска има преголема желба да биде премиер, додека пак Оливер Спасовски, барем засега, има желба да ја преживее кризата со бегството на Груевски и да остане министер за внатрешни работи.

Како и да е, најкасно пред крајот на Јануари ќе биде јасно кој победил, а кој е губитникот во оваа борба за превласт во владејачката СДСМ!