Срамен беше денешниот чин и начин на обраќање на претседателот на Стопанска Комора на Република Македонија, Бранко Азески кој на седница на членовите пред премиерот Заев и вицепремиерот Анѓушев изјави “Бизнисот ќе ви го штити грбот, премиере!”

Силна поддршка од бизнисмените од Стопанската комора доби премиерот Зоран Заев да истрае на патот на интеграција на земјата во НАТО и ЕУ, што подразбира и поддршка за успешен референдум. Бизнисмените, како што рекоа, очекуваат и политичко помирување за да им се создадат безбедни услови за работа.

Нe уверивте во потребите бизнис заедницата да ги поддржи напредните идеи на државата. Ги знаеме и ги цениме сите напори што ги направивте во изминатиот период. Бизнисот поддржува напредни идеи и ќе Ве штити на патот на интеграциските процеси – му даде ветување претседателот на Стопанската комора, Бранко Азески на премиерот Зоран Заев на денешната трибина за перспективите на македонската економија преку членството во ЕУ и во НАТО.

Од Комората тоа и сликовито го прикажаа со три подароци за премиерот: маичка со ознака BMW која треба да значи дека на премиерот му е потребна моќна машина на патот кон ЕУ и НАТО, заштитен елек за грбот за да го обезбеди додека тој будно останува зад воланот додека вози на интеграцискиот пат и транспарентни елечиња за неговиот тим, за да не заборават на транспарентноста која ја ветија при изборот.

Сликовита и со посебна порака беше и најавата на трибината кога Азески ги праша премиерот Заев и вицепремиерот Кочо Анѓушев за мислење дали Македонија кон НАТО и ЕУ треба да се движи со брзина од 50 километри на час како „веспа“ или со 150 километри на час како мотор од типот БМВ на што премиерот одговори дека „тоа можеме да го постигнеме само со брзи мотори, односно со брзо движење на целата економија. Целта е по влегувањето во ЕУ и НАТО да возиме со голема брзина“.

Македонија мора да направи квантен скок, да се качи на мотор од 1.600 кубика за да ја забрза својата перспектива, а тоа е можно само ако стане членка на НАТО и ЕУ. Верувам дека ќе успееме. Ова прашање е многу важно за сите, за земјава генерално, за граѓаните, но и за бизнисот. Не е исто да имате пазар од околу 1,5 милиони и пазар од 500 милиони жители – рече Заев.