Утринава порталот Република објави загрижувачка фотографија на која може да се забележи неисправен автобус на компанијата „Дурмо турс“.

Како што објави порталот тие стигнале до фотографија на која автобусот во сопственост на „Дурмо турс“ вози со гума која само што не испаднала. Автобусот испуштал и задушлив мирис на чад. Фотографијата е направена во центарот на Скопје, на крстосницата пред Владата. 

Како што објави Република, станува збор за автобус во кој се превезуваат патници на релација Гостивар-Скопје, а поминал технички преглед.

Дали и ова е уште еден исправен автобус на компанијата која тврди дека нејзините автобуси поминуваат редовни технички прегледи два пати во годината, и се прегледуваат секогаш пред да заминат на пат. 

За потсетување пред неполни четири месеци Македонија беше завиена во црно, токму откако во автобус на оваа компанија загинаа дури 16 патници кои се возеле на релација Гостивар- Скопје.  Автобусот вкупно превезувал 51 патник, сите од Гостивар.

Несреќата кај Ласкарци се случи на 13 февруари кога автобусот на „Дурмо турс“ излета од патот Тетово – Скопје и падна во провалија откако ја проби заштитната ограда на автопатот. Во несреќата загинаа 16 лица.

Во меѓувреме, од затворски во домашен притвор отидоа првоосомничениот – сопственик на „Дурмо Турс“ Дурмиш Белули и шестоосомничениот – возач на автобусот.