Откако лидерите на власта и опозицијата постигнаа договор за избори и истите ќе се одржат на 15 јули, синоќа и претседателот на Собранието Талат Џафери го потпишал решението за распишување на изборите.

-Решението за изменување и дополнување на Решението за распишување на предвремените избори за пратеници во Собранието на Република Македонија на 15-ти јули 2020 година го потпишав синоќа и истото е архивирано и пратено до Државната Изборна Комисија, до Министерството за надворешни работи и Министерството за правда, со што се запазуваат роковите за деновите утврдени во Уставот, се вели во изјавата на Џафери.

Џафери посочи дека поради целата ситуација од епидемијата со коронавирусот во земјава беа одложени предвремените избори закажани за 12-ти април, но сега има шанса за одржување на изборите. 

-Имено, како што ви е веќе познато, политичките лидери во Република Македонија постигнаа договор за закажување на нов датум за одржување на предвремените парламентарни избори. Консензуалниот датум на власта и опозицијата е 15-ти јули 2020. Овие избори ќе бидат невообичаени по тоа што нема да има вообичаена изборна кампања, меѓутоа, тоа што е поважно и на кое ќе мораме сите да се придржуваме на најдисциплиниран начин се мерките и препораките на Министерството за здравство, со цел да се заштити здравјето и животот на граѓаните, се вели во соопштението на Џафери.