Светскиот Македонски Конгрес изразува жалење од изјавата на албанскиот министер за надворешни работи Гент Цакај при вчерашната посета на бугарската министерка за надворешни работи Екатерина Захариева во Софија, дека “бугарското етничко малцинство во Албанија служи како мост меѓу двата народа“, иако во Албанија “бугари“ нема, а за “бугари“ во односите меѓу Софија и Тирана се сметаат Македонците во Албанија!

СМК најостро ги осудува територијалните претензии на Софија кон Македонија од времето на руската креација “Санстефанска Бугарија“ од 3 март 1878 година и хегемонистичките апетити на Софија и кон Албанија, која со злоупотреба на правото на вето за членство во Европската Унија ја изнуди во Законот за заштита на националните малцинства донесен во 2017 година, покрај, Македонците, Грците, Власите, Ромите, Црногорците, Србите, Египтјаните и Бошњаците, дa го впише и непостоечко “бугарско малцинство“, имајќи предвид дека за Софија “бугари“ во Албанија се Македонците.

СМК не ја спори помошта што Бугарија и’ ја пружа на Албанија преку нејзините фондови и фондовите на Европската Унија, меѓутоа најостро протестира, затоа што тоа Софија го прави во областите каде живеат Македонците, а проектите ги претставува како помош за “бугарското малцинство“ во Албанија, општините и селата каде што живеат Македонци ги именуваат за “бугарски села и општини во Албанија“.

СМК ја осудува денационализаторската мисија на Фондацијата “Бугарска памет“ на Милен Врабески меѓу Македонците во Албанија, во обидот за нивна денационализација во “бугари“.

СМК изразува разочарување од контактите на македонски државници и клирици со Милан Врабески и Фондацијата “Бугарска памет“ и покрај нејзината антимакедонска мисија!

СМК ја повикува Македонската влада да обезбеди видлива поддршка за Македонците во областите Врбник до Билишта, Мала Преспа, Голо Брдо и Гора, и други места каде живеат Македонците, како што тоа го прави Бугарија со: изградба на асфалтен пат меѓу градот Билишта и селото Врбник каде што живеат етнички Македонци; помошта на општина Пустец во противпожарно возило, амбулантно возило, теренско возило за социјални работи; компјутерска училница, библиотека и канцеларија за наставниците во гимназијата во Пустец; како и средствата за тековно работење на новоформирани “бугарски друштва“ со Македонци на кои им издава бугарски пасоши.

СМК протестира поради злоупотребата на бугарските пасоши за Македонците во Албанија како можност за евиденција на Македонците со “бугарски корени“ во обидите да се иселат од Албанија во земјите на Западна Европа.

Пишува Тодор Петров