“Недовербата на граѓаните во вакцините ја предизвика токму досегашната неодговорна, криминална власт во заминување од којашто е дел Никола Тодоров. За децата набавуваа вакцини по најевтина цена, додека за скапите реклами со коишто корумпираа медиуми, бараа квалитет?! Доцна е сега Тодоров да бара од граѓаните да веруваат во безбедност на вакцините.“

Ова е партиското соопштението на СДСМ од 21-ви Април 2017 година, на тема вакцини, имунизација и здравствена политика. Цели 6 години, од 2011-2017 година, СДСМ водеше жестока хајка против Никола Тодоров, како министер за здравство, но и како еден од најблиските соработници на тогашниот премиер Груевски. Го нарекуваа “Министерот Смрт“, го обвинуваа за криминални набавки на вакцини и за се друго, но во сите политички обвинувања СДСМ заборави дека прави поголема општествена штета, а тоа е зголемувањето на недовербата во целото здравство и кон лекарите. Како делумна последица на тоа, многу луѓе одлучиле или биле доведени во заблуда да не ги вакцинираат своите деца. Сето тоа зачинето со разни “онлајн стручњаци“ кои некаде прочитале дека вакцините не се здрави, треба да се примаат покасно и слични полуписмени тези во кои секој се прави поголем лекар од лекарите. И сега еве го проблемот на врата, епидемија на морбили во главниот град, што е показател за слабиот здравствен систем во државата.

Владата на СДСМ сега треба да го решава проблемот што во добар дел и го создаде, а тоа да се врати довербата во здравствениот систем, кој до вчера беше гледан само како мегдан за добивање на ситни политички поени. Министерот Филипче извести дека на територијата на градот Скопје има 19 случаи на мали сипаници и дури 15.000 невакцинирани деца. Тоа е загрижувачка бројка. Владата извести дека родителите кои нема да ги вакцинираат своите деца ќе бидат казнети од 350 до 650 евра. И ако до вчера Филипче му беше советник на министерот Тодоров, сега можеби министерот Филипче ќе го покани Никола Тодоров за советник, и во духот на помирувањето кое го имаат за менувањето на Уставот, сега истото да го докажат и во борбата против сипаничната епидемија за која и двајцата сносат одредена одговорност. Како и да е, самото здравство во моментов се соочува со болест во чие создавање и Тодоров и Филипче биле дел од проблемот и затоа сега граѓаните се во недоумица дали ваквите политичари се способни да понудат решение. Најефективно би било доколку лично Филипче го вакцинира Никола Тодоров пред ТВ-камерите, и тоа со вакцина против политизација на здравството.