Алијансата за Албанците бара итно да се преземат сите законски мерки за да се расчисти целосно случајот „Рекет“ и да се прошири истрагата. Истовремено од партијата на Зијадин Села преку соопштение бараат да се отвораат истраги за сите предмети коишто се во предистражна постапка, како што е предметот „Пациент” и други.

„Случајот ‘Рекет’ е доволен доказ дека сите тие случаи се пропаднати поради рекет, додека видеоматеријалот  што е објавен денес го потврдува тоа. Алијансата за Албанците уште еднаш го повторува барањето за обвинител од ЕУ како решение за излез од ќорсокакот во кој е најден нашиот правосуден систем“, велат од Алијансата преку соопштение.

Инаку, во случајот „Пациент“ СЈО заедно со уште 14 лица го сомничи Бујар Османи дека како ексминистер за здравство од 2010 одобрил предлог на Комисија за јавни набавки, која, пак, спровела фаворизиран тендер за бугарска фирма која била избрана да реконструира неколку болници низ земјава.