Магазин дојде до документи кои откриваат многу детали за случајот на плаќање “Рекет“ од 233.000 евра од фирмата “Дрим Билдинг“, управувана од Ардијан Амзоски, зет на Фијат Цаноски, фактурирани на име на Јасна Мандиќ, еден од основачите на Меѓународниот сојуз на Боки Тредичи. За целата оваа ситуација добро бил запознаен и обвинителот од СЈО, г-н Бурим Рустеми, бидејќи истиот е дел од тимот на обвинители на Катица Јанева кои прво, на 13-ти октомври 2017 донесле решение за воспоставување на стварна надлежност врз предметот на ОЈО-Скопје кој се водел против Ардијан Амзоски и “Фине ДОО Скопје“, а само по две недели, на 26-ти октомври 2017 година, донесле решение за запирање на кривичната постапка против Ардијан Амзоски за објектот “Космос“. Накратко, изгледа дека зетот на Фијат Цаноски со 233.000 евра си го платил непродолжувањето на судскиот случај против него, а за чие запирање клучен бил потписот на обвинителката Јанева!

Денешното сведочење на обвинителот Рустеми е многу битно за судбината на Катица Јанева, и за тоа дали и таа ќе биде осомничена или наскоро можеби и обвинета во мега скандалот “Рекет“? Затоа што сите овие постапки биле сторени со потпис на специјалната обвинителка Катица Јанева, но за текот на целата постапка бил запознаен и учествувал со свои извештаи, мислења и предлози, и обвинителот Бурим Рустеми, како помошник на Катица Јанева и предметен обвинител за случајот “ТНТ“, во кој лицето Ардијан Амзоски и фирмата “ФИНЕ ДОО“ од тужени, стануваат оштетени странки. Инаку парите од Ардијан Амзоски, преку фирмата “Дрим Билдинг“ од Струга, во денарска вредност изнесувале 16.103.986 денари, и што е многу чудно вкупните приходи на неговата фирма во 2017 година изнесувале 14.385.386 денари, односно речиси 1.000.000 денари помалку од уплатениот износ на Меѓународниот сојуз на Боки Тредичи. Прашање е дали обвинителот Бурим Рустеми знаел или требало да знае за овој податок, дали се проверило потеклото на парите на фирмата на зетот на Фијат Цаноски? Дали обвинителот Бурим Рустеми знаел за потпишувањето на меморандумот меѓу “Дрим Билдинг“ и Меѓународниот Сојуз за изградба на центар за возрасни лица во општина Карпош? Дали Бурим Рустеми се посомневал во постапките на специјалната обвинителка Јанева, дали ја предупредил писмено или усно за можните последици, или можеби бил соучесник во овој дел од скандалот “Рекет“?

Во следните броеви Магазин ќе објавува делови од тие документи кои фрлаат светлина на оваа темна страна на постапките на СЈО, а поврзани со Ардијан Амзоски, Фијат Цаноски, Катица Јанева и Боки Тредичи.