Во тешка сообраќајна несреќа што се случи попладнево на патниот правец Елбасан-Пеќин, четири лица го загубија животот, а две се тешко повредени.

Во тешката сообраќајната несреќа учествувале три автомобили, во близина на селото Папер. Причина за несреќата е влажниот коловоз и неприлагодената брзина според условите на патот, стои во соопштението.

-Во сообраќајната несреќа што се случи во близина на селото Папер, животот го загубија четири жени а двајца мажи се тешко повредени. Жените, кои се на возраст од 30, 55, 60 и 68 години заедно со едно од повредените лица се враќале од погреб. Причина за несреќата е влажниот коловоз и неприлагодената брзина според условите на патот, поради што возилото во кое биле настраданите се излизгало и удрило во еден, па во друг автомобил и излетало од патот, стои во соопштението.

Во извештајот на Светска банка стои дека Албанија има едно од највисоките нивоа на смртност во сообраќајни несреќи во Европа, со просечно 84,7 загинати годишно на 100 илјади возила.
Според Банката. овој податок е најмалку двапати повисок од оној во земјите од регионот, каде смртноста при сообраќајки изнесува од 13,8 загинати на 100 илјади возила во Грција, до 41,3 во Црна Гора.
Доколку се направи споредба со податоците во развиените западни земји, смрттноста при сообраќајни несреќи во Албанија е дури и десетпати повисока.