Повеќе градови во Австралија се евакуирани поради големиот број на шумски пожари кои беснеат во две австралиски сојузни држави.

Како што пренесува Ројтерс, противпожарната бригада од Њу Саут Велс издала предупредување за 17 пожари и ги советувала луѓето да го напуштат подрачјето или да најдат засолниште.

Во природниот резерват Лејк Инес се уништени две третини од популацијата на коали минатиот месец, а остатокот е загрозен поради новите 15 пожари во австралиската југоисточна сојузна држава Њу Саут Велс.

Тоа значи дека околу 350 коали настрадале во пожарот, соопштија австралиски организации за заштита на животните.

Моментално горат повеќе од 50 помали пожари, а противпожарната служба примила информации дека поедини луѓе се заробени во своите куќи, известува националната телевизија „АБЦ“.

Медиумите известуваат дека повеќе од 1.000 пожарникари и 70 авиони учествуваат во гаснењето на пожарите.