Некултурно, арогантно и надвор од сите новинарските стандарди новинарот Сашо Ордановски го водеше интервјуто со Претседателот на ВМРО-ДПМНЕ, Христијан Мицкоски. Необјективноста, пристрасноста, немањето на концепт и застапувањето на ставови а не реална критика го одбележаа телевизиското интервју на 1 ТВ. 

Преку целото интервју, Орданоски беше пристрастен во полза на власта и жолчно го бранеше ликот и делото на премиерот Зоран Заев и ги релативизираше скандалите на актуелната власт. Овој стил водење на интервјуто многу потсети на интервјуто со кој Латас пред три години имаше интервју со тогашниот лидер на опозицијата Зоран Заев каде имаше низок стил и нестандарден новинарски јазик. Дали Орданоски го намирисал крајот на Зоран Заев и СДСМ па се решил во улога на камиказа да ја спасува власта по цена да си ја извалка долгата новинарска кариера ? 

Конфузијата на новинарот, поставувањето на исти или слични прашања во текот на интервјуто со цел да го збуни соговорникот а во некои моменти се користеа и лични навреди и омаложувања кон соговорникот, во случајов претседателот на ВМРО-ДПМНЕ на крајот сепак излезе како лош телевизиски производ.

Нејасна е целта зошто Орданоски го поканил Мицкоски на интервју, а од она што го видовме – за да го понижува од позиција на домаќин, на некој кој по логиката на нештата е надреден. Повеќепати му повтори дека е машинец и не се разбира во право, па потоа како учениче да го пофали бидејќи му оди математика. 

Орданоски се обидуваше да го дискредитира ВМРО-ДПМНЕ  и  Христијан Мицкоски шпекулирајќи со какви пари е стекнат имотот на неговата партија, но во истиот тој арогантен и дрзок манир не му дозволи да се одбрани. Исто течеше разговорот и на темата случаите на СЈО, за кои Орданоски од ракав тресеше милионски суми со кои ВМРО-ДПМНЕ ја оштетило државата, а Мицкоски немаше право да се посомнева во „математиката“ на домаќинот.

Ако во времето на владеење на ВМРО-ДПМНЕ, кое заврши пред повеќе од две години а кое беше во фокус на новинарот Орданоски, имаше „заробени“ медиуми, денес во „цутот“ на демократијата видовме телевизиско интервју далеку од новинарските стандарди и новинарската етика. Според стилот и речникот на Орданоски, премногу е очигледно дека пред интервјуто со Мицкоски рол модел му било интервјуто на Латас со Заев пред три години.