СДСМ потроши половина од својот мандат на жалби и поплаки. Две години власт, а Владата ништо не работи. Наместо да возиме по нов автопат, ние слушаме невистини од вицепремиерот Кочо Анѓушев дека сè било закочено, а тој успеал да откочи, реагираат од опозициската ВМРО-ДПМНЕ.

„Ветуваа 600 километри нови автопати, 550 километри нови магистрални патишта и 1.100 километри локални патишта, помина половина мандат, а ништо од тоа не е ни почнато да се прави, напротив, дури и проектите што се веќе почнати и во напредна фаза на реализација, поради неспособност, не може да ги завршат.

Проектите за автопатот Кичево-Охрид, кој од владата на ВМРО-ДПМНЕ беше оставен во напредна фаза на реализација, се правени од реномирани проектанти, а ревидирани од професори од Градежниот факултет. Доколку имало недостатоци во проектите, тие биле должни да констатираат и да укажат.
СДСМ не успеа да направи ниту километар од овој автопат, напротив, губи време на измислување проблеми каде што ги нема.

Цените и во основниот договор не се произволни, туку се утврдени по правилата на ФИДИК, на кои се повикува и Анѓушев. Кога е преговарано за договорот, според правилата на ФИДИК, произлегле тие цени, со оглед на тоа што параметрите се менуваат, се добиваат нови. ФИДИК-правилата и Законот за облигациските односи предвидуваат дека цените се променлива категорија во зависност од берзанските цени и аналогно на тоа може да бидат повисоки или пониски.

Додека соседните држави денес во Бугарија се на конференција за поврзување, безбедност и стабилност, на која присуствуваат првите луѓе на Бугарија, Грција, Србија, Романија, а на која ќе се дискутира и за инфраструктурано поврзување, Заев и картелот околу него се занимава со промена на името“, велат од ВМРО-ДПМНЕ.