Негативниот тест за влез во Словенија без карантин од понеделник ќе биде пократок од досега, се вели во новиот протокол на владата, која реагираше на забрзаното ширење на сојот омикрон

Валидноста на негативниот ПЦР тест при влез во Словенија ќе биде 48 часа од земањето брис, а на брзиот антигенски тест 24 часа од земањето брис, додека другите услови не се менуваат, пишува РТВ Словенија.

Во возовите и автобусите бројот на местата за седење е ограничен, а потребно е и одржување растојание меѓу патниците на местата за стоење. За контрола и спроведување на протоколот се задолжени организаторите на транспортот, односно јавните сообраќајни претпријатија.

Според неофицијални податоци, во Словенија во последните 24 часа се потврдени 4 468 нови инфекции, речиси 3 000 повеќе од пред седум дена, а епидемиолозите стравуваат дека со ширењето на сојот омикрон, кој станува доминантен, бројот на дневни инфекции во врвот на новиот бран може да се зголеми на 10 000, па и повеќе.