Се поголеми се шпекулациите дека Тони Јакимовски актуелниот началник на СВР Скопје е предлогот за првото столче во Бирото за јавна безбедност на местото на Лазе Велковски чие разрешување се очекува денеска на барање на министерот Спасовски се дознава од свои извори во Владата.

Според нив името на Јакимовски е стигнато и на Илинденска број 2 со цел да биде ставено како точка на дневен ред на денешната владина седница.

Официјално од Влада не потврдуваат дали началникот ќе биде тема на дискусија денеска со објаснување дека кадровските решенија се отвораат на самите седници односно ретко кога се знаеле однапред.

Јакимовски како солуција е понуден од повисоки инстанци. Особено ако се знае неговата досегашна биографија во која стои дека тој бил дел од МАРРИ Регионалниот Центар на регионалната иницијатива за миграции – азил и бегалци – Скопје а како дел од овој тим со одлука објавена во Службен весник во септември 2008 година Јакимовски е именуван и за член на Меѓуресорската група за креирање на миграциона политика на Република Македонија.

Според ставот на премиерот во врска со разрешувањето на досегашниот и именување на нов директор на БЈБ општиот впечаток е дека Велковски е лице за кое Заев има високо мислење па дури и инсистирање тој да остане да му служи на министерството за внатрешни работи и покрај грешката што според експертите е кривично дело.

Дали тоа е истиот Тони Јакимовски кој беше поранешен шеф на кабинетот на поранешниот директор на УБК Сашо Мијалков и на 19-ти септември 2017 година беше разрешен од СЕЛЕК – регионалната мрежа за борба против криминалот со седиште во Букурешт и е обвинет од СЈО во случајот “Тврдина” за уништување на системите со кои нелегално се прислушувало?!