До крајов на годинава американскиот амбасадор Џес Бејли си заминува од функцијата во Македонија, а на негово место доаѓа досегашниот заменик амбасадор од Атина Мери Кејти Бирнс.  

Американскиот амбасадор Бејли ќе остане запаментен по контроверзната изјава која ја даде пред да дојде во Македонија со која ги поткрена и тензиите откако на сослушувањето во американскиот Сенат изјави дека во земјава живееле мнозинство Словени и малцинство Албанци.

Бејли во текот на неговиот мандат одигра клучна улога во сите важни историски настани.

Предходно беше вршител на должноста амбасадор во Амбасадата на САД во Анкара, каде почнал во јули 2011 како заменик амбасадор. Пред тоа, тој работел во Стејт Департментот како директор на Канцеларијата за Јужна Европа, каде ги менаџирал билатералните односи со Турција, Грција и Кипар.

Засега нема најава каде амбасадорот Бејли кој е професионален дипломат од кариера ќе ја продолжи својата дипломатска активност.

Доколку се покажат како точни шпекулациите дека неговата наследничка ќе биде Бирнс, која во Атина е како заменик шеф на мисијата е од септември 2017 година. Таа има богата 24-годишна дипломатска кариера.

Нејзината претходна задача беше во мисијата на САД во Организацијата за безбедност и соработка во Европа (ОБСЕ) во Виена, Австрија, каде што, исто така, беше заменик-шеф на мисијата од септември 2014 година.

Претходно, била на позиции во Стејт Департментот за европски и евроазиски прашања, во канцеларијата на државниот секретар за јавни работи и јавна дипломатија и во Комитетот за надворешни односи на Сенатот. Работела како советник за јавни работи во Мисијата на САД во НАТО во Брисел, Белгија, од 2007-2010 година.

Од 2010-2011 година, била Виш цивилен претставник кој го надгледува управувањето и развојот во источниот дел на Авганистан, како дел од Меѓународните сили за помош во безбедноста.

Во дипломатските кругови Бирнс важи за одличен познавач на гео-политичките состојби во регионот, и одлично е запознаена и со процесот на преговори за името со Грција.

повеќе информации за можниот иден амбасадор на САД во Македонија, можете да најдете тука