Поранешната пратеничка од СДСМ и поранашен  претседател на Градската организација во Скопје, Софија Куновска жестоко ја критикува Радмила Шеќеринска и актуелната влада за кадровските решенија и политиките кои ги спроведуваат.

Во последниот фејсбук статус таа ја обвини Радмила Шеќеринска дека “расчистува” со потенцијалните конкурентки во партијата. 

Го поздравувам ставот на Шекеринска во кој „жали што се уште се прашуваме дали е време за жена претседател на Македонија“ и што „само во Македонија може се уште да се видат фотографии  од политички активности на кои не може да видите ниту една жена“.

Истовремено, жалам што самата не се смета себеси за речиси најодговорна за таквите состојби, откако како креатор на политиките на највисоко ниво, ја расчисти скоро сета „женска понуда“ околу себе.  

Како личности кои биле жртви на византиските игри на Шеќеринска,  Куновска ги споменува д-р Илинка Митрева, професорката Славица Грковска, д-р Каролина Астеруд Ристовска, Весна Бендевска, но и многу други во низата.

Начинот на кој Шеќеринска го одржувала приматот во СДСМ, Куновска го објаснува со зборовите

Во византиските игри на Шекеринска, кога станува збор за учество на жените, најпосакувани кадровски решенија се често жени претставнички на помалите коалициони партнери или независни кандидатки, со што себеси си овозможува полесен маневарски простор за нивна елиминација кога и да посака, бидејќи така се исклучува можноста за градење партиска кариера и структура внатре во самата СДСМ.

Куновска во оваа група на жени кои не биле опасни по тронот на Шеќеринска ги споменува Солза Грчева, Љубица Буралиева, Лилјана Поповска како и пратеничките кои доаѓаат од редот на шарените најверојатно мислејќи на Ивана Туфегџиќ и Ирена Стефоска. 

На крај Куновска ја повикува Шеќеринска да покаже принцип а не личен интерес

Затоа, можеби е време конечно – за да се покаже принцип, а не личен интерес – токму Шекеринска за претседател на РМ да предложи и поддржи кандидат жена, а тоа да не е таа самата.

Мирјана Лазаревска Трајковска, Илинка Митрева,  Наташа Габер… се само некои од  можните кандидатки со навистина висок углед во нашата држава, но и надвор од неа.