Руската рок-група „Землене“ направи своја верзија на песната од нашата најголема музичка звезда на сите времиња, Тоше Проески „Боже чувај ја од зло“, но во јавноста ја претставува како своја авторска песна под името „Боже“.

На украдената песна како автори се појавуваат имињата на Владимир Киселев и Владимир Трушин. Киселев се пишал како автор на песната, а Трушин си ја присвоил музиката.

На Јутуб плагијатот „Боже“ од Руската рок група, во моментов има скоро 120 илјади прегледи.

„Во ред, ја украдовте песната на Тоше, но вашето пеење е катастрофално и треба да се срамите што сте го ставиле вашето име и глас преку она на македонскиот пејач“, „можевте да споменете дека песната е на Тоше Проески“, „вие сте крадци и ги прекршувате авторските права“ и „засрамете се што ја украдовте и уништивте песната на Тоше“ се само дел од коментарите кои обожавателите на починатата легенда на македонската и балканската музика ги упатија кон рускиот бенд на Јутјуб.

Песната „Боже чувај ја од зло“ е дел од последниот албум на Тоше Проески, „Игри без граници“, издаден 2007 година. Албумот беше издаден на македонски и српскохрватски јазик. Музиката за песната ја направи Миро Буљан, а оригиналниот текст го напиша Антонија Шола. Препевот на македонски јазик е на Владо Јаневски.