Ѕвездата на Медена земја, Атиџе доколку отпатува на Оскарите сака да испее една песна пред сите славни холивудски актери.

Атиџе се уште живее во селото Бекирлија, таа за А1он ја откри желбата и песната со која сака да се престави пред светот.

Очекува да ја повикаат и таа да отпатува за Америка.

За животот по „Медена земја“, за односот со нејзината мајка, за нејзините сништа. Што добила, што изгубила, што се променило во нејзиниот живот. Меѓу Македонија и Америка, вели, секогаш ќе ја избере Македонија.

Целата приказна прочитајте ја на А1он.

„Медена земја“ е филм за Атиџе, последната жена-одгледувач на диви пчели во Европа, која живее сама со својата мајка во централна Македонија. Главна идеја на филмот е да се прикаже припадноста на човекот кон природата и нарушување на природната рамнотежа преку судир на два различни начина на искористување на природните ресурси. Продукцијата е на „Аполо медија“ на Стефанов и „Трајс филмс“ на Атанас Георгиев. Музиката во филмот е на „Фолтин“.

Ентони Кауфман од „Скрини интернешнал“ по премиерата изјавил: „Бев скептичен, но откако го гледав се убедив дека гласините кои се ширеа на Санденс за македонскиот документарец ‘Медена земја’ се вистинити. Овој документарец е совршен колку што еден документарец би можел да биде“.

Во рецензијата од Шери Линден од „Холивуд рипортер“, меѓу другото стои: „Во оваа ера на кризи на изумирање, загрозени природни живеалишта, безобѕирно профитирање, ‘Медена земја’ раскажува приказна со универзален одглас, дури и кога открива заборавено место, кое е толку специфично и необично, што повеќето современи луѓе од западниот свет никогаш не би можеле ни да го замислат“.

„Исклучително рафинираното чувство за препознавање на уникатниот документаристички филмски јазик и повеќеслојноста во овој наратив беше провокација за публиката која по премиерата, во минутите определени за прашања и одговори, настапи со огромна љубопитност и многу комплименти и според еден од организаторите на Санденс, ова е еден од ретките документарци на фестивалот, воопшто, на кој целата публика останала на прашања и одговори по филмот“, велат од екипата.