И оваа година Владата ги продолжи субевнциите за климите инвертер пред почетокот на грејната сезона.

Но овој пат со оваа мерка граѓаните имаат можност да добијат сто проценти субвенција.

– Секој граѓанин кој ќе сака да добие сто-постотна субвенција за замена на печката на дрво со високо ефикасен инвертер ќе потпише договор со општината каде живее и ќе се обврзе дека ќе го даде грејното тело кое е на дрва, а на сметка на тоа ќе користи високо ефикасен инвертор, изјави денеска заменик министерот за животна средина, Јани Макрадули

Како што рече Макрадули, со потпишувањето на договор со Општината, граѓанинот ќе се обврзе дека во неговиот дом може да се направи контрола за да се провери дали ја користи климата. За секоја злоупотреба, рече тој, ќе има санкции.

-Никогаш не е доцна за добра мерка. Оваа мерка зависи од финансиските средства и мора да се склопи како законско решение, ќе бидат предвидени стандардите, нема да дозволиме инвертори без гаранција – рече Макрадули додавајќи дека Данска субвенционирала по 530 евра за оваа мерка, Германија по 1.000 евра, а дека мерката се спроведува и во Полска, Чешка, Словачка и Бугарија.

-Предност ќе имаат ранливите семејства и зоните кои се осетливи, како Ново Лисиче. Досегашниот топлотен комфор ќе биде заменет со два инвертори, а вредноста на тој систем е околу 1000 евра – рече Макрадули.

Право на учество 

Право на субвенционирање на дел од средствата за купување на инвертери во 2019 година имаат физички лица кои се жители на Град Скопје (општините во градот: Аеродром, Бутел, Гази Баба, Ѓорче Петров, Карпош, Кисела Вода, Сарај, Центар, Чаир и Шуто Оризари) и кои ги исполнуваат следниве услови:

-да има живеалиште на подрачјето на град Скопје (општините: Аеродром, Бутел, Гази Баба, Ѓорче Петров, Карпош, Кисела Вода, Сарај Центар, Чаир и Шуто Оризари)

-инвертерот да го купил во 2019 година, се до завршување на јавниот повик, односно исцрпување на средствата од Буџетот на Град Скопје за субвенционирање за купување инвертери

-да нема искористено субвенции од кој било извор во Република Македонија за затоплување на своето домаќинство (станбен објект)

-до поднесување на барањето да е корисник на печка на јаглен, дрва, нафта или мазут

-станбениот објект да не е во фаза на градба и во него барателот да живее

-да нема приклучок на градско централно греење во станбениот објект каде што ќе биде инсталиран уредот, без оглед на тоа дали го користи

-да има платено данок на имот за станбениот објект каде што ќе биде инсталиран уредот, заклучно со 2018 година

-Само едно лице по домаќинство може да поднесе едно барање за добивање надоместок исклучиво за набавка на еден уред.