Заев изјави дека со Ахмети се во потрага по консензуален кандидат за претседател на државата во духот на паролата “едно општество за сите“. Но, трикот е провиден. Тоа нема да биде кандидат за сите и на сите граѓани, туку тоа ќе биде кандидат кој им одговара на Заев, на Ахмети и можеби на уште неколку влијателни функционери од врвот на ДУИ и СДСМ.

Дали Заев ги претставува сите македонци. Не! Дали Ахмети ги претставува сите албанци. Уште помалку. Кој одлучува во име на ромите, турците, србите кога ќе се договара можен консензуален канидат за претседател? Никој. Како ќе бидат консултирани партиски неопределените гласачи пред двајца партиски лидери да се договорат за нивниот фаворит за претседател на државата? Никако. Општеството е многу повеќе од кланот на Заеви, и од тендер екипата на Ахмети, како Бујар Османи, Исмаил Пуцко Петрол и Арбер Адеми. Тие се мал дел од општеството, но не се и не можат да бидат претставници на целото општество.

Истовремено, многу гласачи на СДСМ со право очекуваа дека Заев ќе донесе правда и одговорност пред законите. Но, денес се сведоци дека, во име на власта, доминираат договори за амнестија, наместени судски пресуди, договори за тендери и апсолутна неказнивост на ниту еден поранешен или сегашен функционер на ДУИ. А токму Заев, прашан во една дебата на “Телма“ дали има намера да прави влада со ДУИ како верни партнери во претходната влада на Груевски, рече: “и по цена на неформирање на влада немам намера да правам коалиција со криминалци“!

Токму ваквиот однос на Заев кон ДУИ може да биде и причина која ќе демотивира многу чесни граѓани, и македонци, и албанци, и роми и турци, воопшто и да не учествуваат на изборите. Но, ваквото елитистичко држење на власта која по секој цена сака да ги завземе сите позиции во државата, може да мотивира и многу гласачи да излезат на претседателските избори и да гласаат против консензуалниот кандидат на Заев и Ахмети. Триковите со фразите “консензуален кандидат“ и “едно општество за сите“ веќе се разоткриени. Таквиот кандидат, без разлика дали тоа е Малески, Шеќеринска или Оливер Спасовски, ќе биде кандидат за претседател кој ќе им одговара само на една тесна група на политичари на власт, а народот повторно ќе биде третиран како неинтелегентна гласчка маса. Но, времињата денес не се исти како вчера.