„Градежништвото малтене е мртво, го убија“, изјави Трифун Костовски на гостувањето во дебатната емисија на 24Вести. Критиката се однесуваше на забраните за градба, особено во Скопје и во општина Центар, кои актуелната власт несоодветно ги менаџира преку недонесување на ДУП-ови и дека многу фирми кои имале добиени банкарски кредити за градежни проекти, денес се несолвентни токму заради ваквите несериозни политики.

Поранешниот градоначалник на Скопје исто така се пожали дека и тој лично 17 години има проблем со парцелата “Кермес“, која ја поседува во Градскиот парк во Центар и има платени комуналии, но дека ниту денес после смената на власта никому не му текнало да му помогне да добие маркица за градба на таа локација. Трифун Костовски истакна дека тој лично ја гледа својата иднина во Македонија, но за жал многу образовани млади луѓе заминуваат од земјата во странство, таму бараат економска перспектива и таму трајно ги формираат своите семејства. Инаку, во изминативе 6-7 години Трифун Костовски важеше за гласен критичар на владата на Груевски и лично даде поддршка на протестите организирани од СДСМ за смена на власта.