Селам алекум, мир во земјата, мир во ИВЗ!

Со овие зборови пратеникот Мухамед Зекири ги отворил портите и срцата на оџите во Исламската верска заедница. Поглаварот на ИВЗ, Сулејман Реџепи, кого Муки пред неколку месеци го пофали од собраниската говорница како визионер, го пречекал високиот гостин од власта со турски локум и саудиски чај. Реизот на ИВЗ, во духот на добрата воља и реформите за членство во ЕУ истакнал дека Исламската верска заедница ќе ги стави на пауза сите преписки и недоразбирања со Владата околу „бавната и дискриминаторска“ денационализација на нивниот имот, и дека оџите нема да зборат ништо лошо против владата во своите 700 џамии во пресрет на претседателските избори.

Во знак на благодарност за ваквиот реформски гест, Мухамед Зекири му рекол дека носи добар абер од премиерот Заев за две работи. Како прво, се додека Македонија е надвор од ЕУ, УЈП принципелно ќе биде надвор од ИВЗ, бидејќи пресумпцијата на невин оџа е посилна од сите други инсулирања. Како второ, дека Заев веќе им дал препорака на Шилегов и Блерим Беџети да не мрчат за изградбата на платформата на езерото Матка, бидејќи таа платформа е целосно компатибилна со Тиранската платформа. По ваквите добри вести поглаварот Реџепи го прегрнал Муки и дискретно му шепнал: Стево алекум, алекум Стево“. На обострано задоволство оваа продуктивна средба завршила со домашна баклава произведена во Арачиново.