Легендата на Форула 1 Михаел Шумахер кој во 2013 година доби страшна повреда додека беше на скијање на француските Алпи  е хоспитализиран во француската престолнина, објави францускиот весник Le Parisien.

Весникот објави дека легендата на Форула 1 Михаел Шумахер бил префрлен од болницата Швајцарија во Париз за дводневна терапија во болницата „Жорџ Помпиду“, каде ќе му биде извршена специјална терапија со матични клетки.

Во моментот, германскиот ас е под надзор на познатиот лекар и професор Филип Менаш, експерт за кардиоваскуларна хирургија.

Како што објави францускиот весник, Шумахер треба да биде ставен на специјална терапија со матични клетки со чија помош ќе му биде зајакнет имунитетот.

Според она што го објавија француските медиуми, ова е трет пат како најпознатиот возач на Формула 1 престојува во болницата во Париз.  Шумахер два пати досега бил во болницата „Жорџ Помпиду“, откако пред пет години, во декември 2013 доживеа тешка несреќа на скијање и доби сериозни повреди на главата.

Од несреќата па се до сега многу малку информации протекоа во јавноста за здравствената состојба на Шумахер, но последната информација беше токму од неговиот најдобар пријател Жан Тод, поранешниот шеф на Ферари кој на почетокот на годинава изјави дека откако го посетил Германецот „некои работи засекогаш се сменија“.

„Нештата никогаш веќе нема да бидат исти. Можам само да кажам дека неговото семејство многу добро се грижи за него и дека тој продолжува да се бори“, рече тогаш Тод.