Актуелниот директор на Македонската опера и балет, Васко Ристов, за Фокус.мк изјави дека „во МОБ долговите се големи и се направени во последните неколку години“.

По назначувањето на Илија Рајковски, а потоа и Ќазим Асотиќ за в.д. директори, Васко Ристов е трет директор кој се жали на финансиската состојба на МОБ и упатува дека долговите биле направени во изминатите неколку години.

Нашите извори упатуваат дека токму во последните неколку години долгот изнесувал околу 600.000 евра и бил намален за 200.000 евра.

Огромните долгови на МОБ всушност датираат од поодамна, од времето на Дејан Прошев кој два мандати раководеше со националната установа.

Иако Рајковски и Асотиќ често пати најавуваа државни ревизии за долговите, сеуште нема официјални информации дали е направена ревизија за утврдување на причините за огромните долгови.

Македонската опера и балет минатата година доби речиси двојно помал буџет од Министерството за култура што се одрази негативно врз работењето на куќата во која ретко може да се најдат премиерни претстави.

Познавачите на проблематиката велат дека изјавите на директорот Ристов не соодветствуваат на фактичката состојба дека огромните долгови датираат од поодамна, а всушност се намалени пред неколку години, ниту пак понудиле некаква визија за намалување на истите.