Еден од најпознатите професори и инфектолози во земјава Вело Марковски во гостувањето  во емисијата ,,Фактор здравје” повторно го истакна својот став дека Вирусот корона кој се рашири низ целиот свет, не е многу вирулентен а смртноста останала на многу ниско ниво, додека пак повеќе од 70-80 проценти од заразените поминуваат со лесна слика.

Марковски укажа дека сега, после повеќе од два месеци од прогласувањето на пандемијата, веќе има посериозни студии поврзани со Ковид-19, но дека и најновите сознанија кои доаѓаат пред сè од Америка, Италија, Шпанија и други земји, не се разликуваат многу од оние кои на почетокот дојдоа од Кина.

Иако постојано од здравствените власти во светото слушаме дека бројот на заболени се зголемува, и дека бројката достигна до 5 милиони заразени, сепак Д-р Вело Марковски вели дека некој што е позитивен на тестот, не значи дека е и болен, со што оваа бројка е многу помала.

Бројките за починати кои доаѓаа од Италија се нереални и таму најверојатно многу пациенти кои починале од други болести, биле евидентирани како Корона.

Според Марковски, Русија и Турција се земји за пример, кои одлично се справуваат со коронавирусот, каде бројот на починати е многу мал и покрај големиот број на заразени пациенти.

Марковски уште на почетокот велеше дека не се потребни карантин и полициски час, па така и сега тврди дека Владата треба да ги укине сите полициски часови и останати мерки, бидејќи на овој начин ние  би стекнале колективен имунитет.