Откако вчера во Италија две лица починаа од новиот коронавирус, а бројот на заразени во земјата достигна 79 лица, се превземаат засилени мерки.

– По вонредната средба поради епидемијата на новиот коронавирус, италијанската Влада презеде активности за изолирање на 11 населени места, од кои повеќето се во северниот регион на Ломбардија, јави ДПА.

Не се дозволени движења и излегување од области за кои се смета дека се места од каде се шири заразата. Потребна е посебна дозвола доколку сакаат даизлезат од изолираното место.

За сега се забранети и откажани сите јавни собири, спортски настани и други настани.

Училиштата и градинките, спортските објекти и продавниците се затворени. Јавниот превоз е запрен. Тие мерки влијаат врз повеќе од 50.000 жители.

Во меѓувреме Јужна Кореја одлучи да го подигне нивото на опасност од новиот коронавирус на највисок степен. Тоа го најави претседателот Мун Џае Ин, откако во таа држава беа регистрирани повеќе од 100 нови случаи на заболени од Ковид-19.

Мун рече дека владата ќе го зајакне целокупниот одговор на вонредни состојби како дел од прогласување на „црвен“ степен на предупредување и дека локалните власти треба да преземат „исклучителони, моќни“ мерки за да спречат ширење на Ковид-19, јави Јонхап.

Јужна Кореја објави 123 нови случаи на коронавирус и два нови смртни случаи, со што вкупните потврдени инфекции се 556 и бројот на починати е четири, според јужнокорејскиот Центар за контрола и спречување болести.