Концертот на популарната светска ѕвезда Стинг, закажан за утре во 21 часот, ќе биде поместен за еден час подоцна, односно ќе започне во 22 часот, поради финалето на Вардар кое ќе се одржи утре во 18 часот во Келн.

Поради настапот на ракометниот македонски првак Вардар на фајнл-фор турнирот во Келн и важниот натпревар кој се одржува утре, кога македонскиот шампион во ракомет ќе игра во финалето од Лигата на шампионите, организаторот на концертот на Стинг, Авалон продукција, го помести терминот. Имено предвидено е „Влатко Стефановски трио“ кои се специјални гости на концертот, ќе настапат од 20,30 часот.

Иако финалето во Лигата на шампионите почнува во 18 часот, сепак организаторите имаат предвид дека Вардар се бори за првото место па луѓето кои имаат купено билети за Стинг ќе можат без брзање да го изгледаат натпреварот во целост па да се упатат кон стадионот.

Светската ѕвезда Стинг (67) во Скопје ќе го има единствениот стадионски концерт од турнејата низ регионот „My songs“.

Стинг по втор пат го стави Скопје на мапата на својата турнеја низ регионот „My songs“. „Englishman in New York“, „Fields of gold“, „Shape of my heart“, „Every breath you take“, „Roxanne“, „Message in a bottle“ се само некои од легендарните песни кои што ќе можат да се слушнат вечерта во Скопје, во изведба на една од најголемите рок ѕвезди на светот на сите времиња.