Пандемијата на корона вирус сè уште е активна и се шири со голема брзина, а повеќето земји сè уште не успеале да ја стават под контрола, предупреди денес директорот на Светската здравствена организација, Тедрос Гебрејсус.

Тој посочи дека од над 11,8 милиони случаи во светот, колку што биле пријавени во таа организација, половина биле потврдени во изминатите шест недели.

Тој оцени дека пандемијата на корона вирус откри нееднаквости, на глобално ниво и во одделни земји, како во медицинскиот систем, така и во поширокото општество, пренесува „Гардијан“.

„Обично се вели дека заразните болести не знаат за граници. Тие не се грижат за политички разлики или за оние меѓу здравството и економијата, животот и опстанокот. Пандемијата„ ковид-19 “ги избриша сите нив“, рече Гебрејсус.

Имено вчера Светската здравствена организација призна дека постојат докази за пренесување на Ковид-19 преку воздух.

-Признаваме дека на тоа поле се појавуваат докази. Можноста вирусот да се пренесува преку воздух на јавни места, особено во посебни услови, доколку се преполни, не може да се исклучи. Но, доказите мора да се соберат и да се толкуваат, рече претставничката на СЗО Бенедета Алегранзи, на брифинг во Женева.