Германија се уште е на почетокот на пандемијата на вирусот Ковид-19 и ќе мора да живее со него некое време, изјави денеска германската канцеларка Ангела Меркел.

“Ние не сме во завршна фаза на пандемијата, туку на почетокот. Придобивме на време и ќе го искористиме тоа за зајакнување на германскиот здравствен систем”, рече Меркел во долниот дом на Бундестагот, пренесува Ројтерс.

Таа исто така рече дека Светската здравствена организација е неопходен партнер на Германија и дека ќе ја поддржи работата на организацијата.

Меркел рече дека ситуацијата ќе биде многу тешка некое време и дека треба да се остане „паметен и внимателен“ за време на пандемијата.

Таа додаде дека се потребни строги мерки за зачувување на достоинството на сите и дека вакцината мора да биде достапна во сите земји во светот кога ќе се пронајде.

„Пандемијата може да се победи само на глобално ниво“, заклучи Меркел.