На прес-конференцијата Министерот за здравство Венко Филипче соопшти дека Македонија ги затвора сите гранични премини за премин на странски државјани, патници и возила, освен за влез и транзит на товарни возила, за претставници на дипломатски кор и други лица за кои МВР ќе даде мислење.
Министерот соопшти дека по состанување на Владата, денеска било одлучено да се затворат сите гранични премини.
Тој ја информираше јавноста дека се затвора и меѓународниот аеродром во Скопје освен за државни, воено карго, медицински хуманитарни и празни летови по истекот од 48 часа по оваа одлука.
На прес-конференцијата се обрати и министерот за надворешни работи Никола Димитров кој апелираше до македонските граѓани да не патуваат!
-Ве молам немојте да патувате! Македонски граѓанин кој утре ќе реши да оди некаде, неизвесно е кога ќе се врати, рече тој.
Димитров апелираше и македонските граѓани кои живеат во странство, во овој кризен период да не се упатуваат во татковината. Порача да ги следат упатствата на тамошните Влади.
Претходно и претседателот Стево Пендаровски излезе на прес-конференција и соопшти дека за сега Македонија добро се справува со Коронавирусот и нема потреба од воведување вонредна состојба.
„Нема потреба од воведување кризна или вонредна состојба во овој момент. Сосема е небитно како ќе ја наречеме таа состојба. Според мерките што се преземаа можно е и во склоп на оваа правна рамка да се воведат уште неколку рестриктивни мерки во однос на движењето на граѓаните од општина во општина, и без да се прогласи вонредна состојба. Ние немаме закон за вонредна состојба. За тоа одлучува Владата. Нема потреба ниту од кризна состојба на цела територија“, рече претседателот.
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.
You must be logged in to post a comment.