Коалицијата на Алијансата за иднината на Косово и Социјалдемократската партија го именува Рамуш Харадинај за заеднички кандидат за премиер на Косово, пренесе РТК2.

Рамуш Харадинај во обраќањето по повод церемонијата за именување, рече дека таксите од 100 проценти за стоката од Србија ќе останат на сила сè додека Белград не ја признае независноста на Косово.

„Нашите кандидати ќе направат напори за зголемување на вработеноста. Тоа се луѓе кои ќе го направат Косово рамноправно и земја со еднакви можности. Нашето Косово, со своите војска, полиција, судство и институции денес е побезбедно. Народот на Косово има свој дом“, рече Харадинај.

Косовскиот премиер Рамуш Харадинај пред два месеци поднесе оставка на функцијата, за време на одржување на седница на косовската Влада.

– Оставката е неотповиклива – рече тогаш Харадинај.

Тој образложи дека оваа одлука е донесена откако добил покана од Специјалниот суд за воени злосторства во Хаг.

Тој негираше дека зад неговата одлука има политички мотиви.