Пејачот на култната загрепска рок група „Парни Ваљак“, Аки Рахимовски, почина денес на неполни 67 години, потврди неговиот менаџер Дамир Осредечки. 

Oваа тажна вест ја сподели групата Парни ваљак на своите социјални мрежи, а во продолжение ви го пренесуваме официјалното соопштение на менаџментот на бендот:

„За жал, нашиот драг Аки не напушти денеска. Ненадејно почина утрото во болницата во Ново Место. Ова е шок за сите нас и во име на семејството и бендот Парни ваљак ве молиме да не` разберете во овие тешки и тажни моменти, ќе ве информираме со дополнителни информации“, вели Дино Бахтијаревиќ, менаџер на бендот „Парни ваљак“.

Починатиот пејач Аки Рахимовски ја чуваше својата приватност далеку од очите на јавноста. Последниов период најактуелна тема беше дека тој станал татко на 65 години, односно дека доби ќерка со таинствената Словенка Барбара која е 30 години помлада од него!

Тие двајца успешно ја криеле веста од јавноста дека чекаат принова речиси три месеци, а и малкумина знаеле дека ќе стане татко во зрело доба.

Во една изјава за медиумите, неговиот пријател и член на „Парни Ваљак“, Хусеин Хасанфендиќ Хус кажа:

„Ако можеше Мик Џегер да стане татко на 74 години, зошто да не може и Аки“.

На пејачот ќеркичката му е трето дете, а се вика Антонија. Тој претходно беше долго во брак со Ингрид со кого ги има синот Кристијан и ќерката Дина.