Покрај мајката, право на породилно отсуство имаат и татковците кое е 100 процентно платено, но по се изгледа кај нас се уште е табу тема породилното отсуство на мажите.

Според податоците од ФЗОМ, во2018 година само 44 мажи ја искористиле можноста да земат породилно отсуство. Најмногу 18 се од Скопје, 5 од Велес, 4 од Струмица.

Бројката е мала и претходните години. Во 2017, 79 татковци користеле ваков надоместок, во  2016 – 54, 2015- 29, 2014 – 14, 2013 – 16, 2012 – 19.

Виктор Николовски е татко на породилно отсуство кој јавно зборува за тоа колку е прекрасно да го чуваш своето дете додека тоа расте.

Тој за порталот Деца.мк изјави дека за него породилното отсуство е супер искуство. Виктор јавно ги охрабрува мажите да го следат неговиот чекор.

„Ќе сфатат дека никогаш не направиле нешто подобро за себе, за детето, а и за сопругата. Истовремено, ќе добијат вистинска слика за тоа како се чувствуваат нивните сопруги додека секојдневно се справуваат со сопствените деца“, им порачува Виктор на татковците кои се двоумат дали да искористат платено отсуство од работа наместо мајките, изјави Виктор за Деца.мк

Инаку пред 10 години и во Македонија беше покрената иницијатива и татковците заедно со мајките 2 месеци по добивањето бебе да седат дома и да добиваат пари од државата, но поради антикризните мерки ова не се реализираше.

Според неофицијални информации на Курир, во Министерството за труд и социјала повторно се подготвуваат измени во законот за работни односи, но засега нема конкретна информација дали и земјава ќе го следи примерот на многу европски држави и колку време и двајцата родители ќе можат да користат породилно и заедно да се грижат за новороденчето.

За разлика од кај нас во Исланд дури 95 проценти од мажите биле на породилно, во Шветска 85 отсто, а во Германија 15 насто.