Утринава се пронајдени две торби со дрвени палки и камења кај црквата Св. Марко, како и на Врачар, пишува Курир.рс. Торбите најверојатно ги подготвиле демонстрантите, кои за вечерва најавуваат уште поголеми протести во центарот на Белград.

Во торбите кои се пронајдени се наоѓале камења, маски и нараквици, а најверојатно демонстантите ги криеле за да предизвикаат уште поголеми инциденти, на големите протести кои се одржуваат во Србија.

Пронајдена е и уште една торба со исти работи, во основното училиште „Дринка Павловиќ„ во центарот на Белград.

Претседателот на Република Србија,  Александар Вучиќ изјави дека полицијата утринава ги пронашла торбите со дрвени палки и камења во основното училиште, по пријавата од страна на вработените.

Протестите во Белград продолжуваат и вечерва се најавени нови демонстрации. Пред неколку недели група демонстранти упаднаа во зградата на Радио-телевизија Србија за време на протестот „Еден од 5 милиони“ во Белград.

Според неофицијалните информации, прв во зградата влегол претседателот на Двери и еден од лидерите на Сојузот за Србија Бошко Обрадовиќ, а вратата на зградата на српската државна телевизија беше искршена, пишуваше Б92.

Учесниците на протестот „Еден од 5 милиони“ ја опколија зградата на Радио-телевизија Србија во Белград и на тој начин ја почнаа блокадата која траеше два часа.

Пред зградата на РТС беше паркиран камион од кој почна емитувањето на „Дневникот на слободна Србија“ на кој граѓаните беа повикани на голем протест, на 13 април во Белград.