Иако министерството за здравство го прогласи 2-ри Јануари за работен, со што илјадници пациенти можеа да го остварат регуларно закажаниот “Мој термин” по основ на прегледи и снимки, сепак пациентите трпат.

Имено Фондот за здравствено осигурување на Македонија, без да именува по чија вина е направената грешка, веќе трет ден остави без осигурување половина јавна администрација во земјата.

Се обидов да си ги купам лековите за кои уредно поседувам рецепти издадени кон крајот на декември. Ми рекоа дека моето здравствено осигурување не е активно и не се во можност да ми ги издатат. Ни приватно ни на рецепт. 

На инсистрање дека сум вработена повеќе од 30 години во јавниот сектор, ми посочија да се обратам во институцијата каде работам, по што добив информација дека сите колеги немаат активно здравствено осигурување. – ни изјави револтирана вработена во јавниот сектор.

Фондот имено три дена молчи за проблемот според кој на огромен број осигуреници им стои дека здравственото осигурување им истекло согласно 31 декември 2018 година.

Официјално од Фондот тврдат дека се работи за проблем, без да прецизираат каков, тврдејќи дека денес до крајот на работното време ќе биде саниран, што пак не е извинување а ни начин за толеранција на проблемот за кој се молчи.

Јас сум со преживеан срцев удар и имам неколку стентови. Мене терапијата не смее да ми доцни ни еден час а не три дена.

Не ми е јасно зошто кога веќе ФЗО имаат проблем не најдат начин како ние пациентите да го решиме својот, имено се работи за животи за кои нема изговори со било какви грешки во системи или не знам што. – изјави граѓанин кој тврди дека од една страна ги почитува упатите од министерството за здравство да не прави “склад” до лекови, а од друга оваа ситуација го вознемирила.

ФЗО и Министерството за здравство јавно молчат. Традиционално неофицијално виновен е системот. Иако дел од вработените во јавниот сектор се во компании со над 50 годишно постоење и со над 30 годишен работен стаж.