Поранешниот грчки премиер и лидер на Сириза, Алексис Ципрас денеска пристигна во Скопје.

Предвидено е тој да се сретне со премиерот Зоран Заев, во пресрет на утрешниот самит на Економист посветен на Западен Балкан.

-Ние, пријателки и пријатели, ја вративме меѓународната слика на земјата. Се осмеливме да се отвориме кон нашите соседи, да спроведеме мултидимензионална надворешна политика на мир и соработка. Се осмеливме за Договорот од Преспа и горди сме, бидејќи затворивме голема рана за земјата, голема рана за Балканот, голема рана на нестабилност во нашиот регион – рече Ципрас за време на синоќешното обраќање на подмладокот на партијата.

Инаку, тој утре ќе учествува на Самитот на Економист „Зајакнување на моментумот за европска интеграција“, посветен на Западен Балкан, а на посебна панел дискусија, заедно со Заев и Мартин Шулц ќе дебатираат во однос на темата „Кои се следните чекори за европска интеграција на Западен Балкан?“.

За потсетување, меѓународениот договор потпишан од шефовите на дипломатијата на Македонија, Никола Димитров и на Грција, Никос Коѕијас на 17 јуни 2018 година во селото Нивици, Грција на брегот на Преспанското Езеро. Истиот беше потпишан и од посредникот на ООН за спорот за името Македонија, Метју Нимиц. Договорот ја заменува Привремената спогодба потпишана во Њујорк на 13 септември 1995 година. Тој би требало да претставува решение на спорот за името Македонија и да воспостави стратешко партнерство помеѓу идната Северна Македонија и Грција. Според истиот Македонија имаше за цел да го промени своето името.