Павле Богоевски нема веќе никаков кредибилитет да биде пратеник и да ги лаже граѓаните со некакви пријави, изјавуваат од ВМРО-ДПМНЕ, откако вчера беше објавена снимка за која се тврди дека Павле Богоевски нарачува канабис.

„Павле Богоевски треба да излезе и да каже дали е зависник од дрога или не е. Единствен начин да докаже спротивното е своеволно да направи тест за дроги и да ја увери јавноста дека е вистина тоа што го збори„

„Постојат отворени сомневања дека Богоевски консумира наркотици и дека е можно неговите изјави, настапи и одлуки да биле под дејство на опијати. Доколку Богоевски одбие или не го направи тестот за дроги истото ќе биде јасен показател дека е зависник од дрога“, стои во соопштението од ВМРО-ДПМНЕ.

„И да се работи за тешка дрога и да се работи за канабис, конзумацијата и трговијата со истото е кривично дело и по однос на случајот Јавното обвинителство треба да поднесе кривична пријава за Богоевски. Признанието на Богоевски е како крадец да се брани дека не украл пари во продавница, туку дека украл некој автомобил. И едното и другото се кривично дело и ниту едното, ниту другото го амнестира од вина“, велат од ВМРО-ДПМНЕ.

Тие очекуваат од Зоран Заев по директното признание од Павле Богоевски дека извршил кривично дело да побара негова оставка, но и Богоевски да покаже морална доблест и да даде неотповиклива оставка од функцијата пратеник во собранието на Република Македонија.