„Обврска на граѓаните е да го прифатат и да учествуваат во  пописот и податоците ќе кажат колку сме“, рече премиерот Заев во интервјуто за ТВ канал 5 на прашањето за пописот, и додаде никој не може и не треба да си „прави филмови“ дека толку ќе биле Албанците, толку ќе бидат Македонците или Турците.

„Ќе бидеме толку колку што сме во државата и тоа е најважниот податок. Јас разговарав со првиот потпретседател на владата Артан Груби и му пренесов дека кога ќе оди во Албанија да се сретне со нашиот пратеник Македонец во албанскиот парламент и со другите граѓани што можат да бидат опфатени со  пописот затоа што ние им служиме на сите, како што сум јас премиер на сите, така и првиот потпретседател на Владата е на сите и министерот за надворешни работи Бујар Османи е министер на сите. Разговарав со вицепремиерот и тој се согласи дека оставил таков впечаток и дека ќе го промени тоа и навистина го променија“, рече премиерот Заев.

„Многу е важно да ги гледаме бројките во остварувањето на буџетот и економските параметри споредбено во првиот квартал оваа година со истиот квартал од минатата година кога последиците од пандемијата уште не беа започнати“, истакна премиерот Заев во интервју за ТВ Канал 5, и додаде дека Буџетот е ликвиден, редовно ги сервисира сите потреби и дека наплатата на приходите од почетокот на годината до 22 март е повисока за 3,3% во однос на преткризниот период лани.

„Приходите, заклучно со првото тримесечје, се реализирани со 22,8 проценти, расходите со 22,4 проценти, а капиталните расходи со 16,6 проценти. Макроекономските движења исто така одат во позитивна насока. Во јануари 2021 година извозот на стоки пораснал за 15,4% на годишна основа. Со засилена динамика продолжија позитивните движења во овој сегмент. Увозот на стоки е со раст од 5,3% и придонесе трговскиот дефицит во јануари да се намали за 29%, а трговијата на мало во истиот период забележа раст од 2%“, рече премиерот Заев.

Согласно последните макроекономски и фискални движења, додаде претседателот на Владата Заев, се очекува во 2021 година да се врати економскиот раст и да ги надмине шоковите од пандемијата.

Предвидувањата се дека со закрепнувањето на надворешната побарувачка, што силно влијае на нашиот извоз, како растот на домашната потрошувачка поддржан од антикризните економски мерки да бидат двигатели на економскиот раст, кој е проектиран на 4,1%.

Премиерот Заев нагласи дека трендовите помагаат во креирањето на следни фокусирани мерки, но претходно треба да се деблокираат и мерките од петтиот пакет во Собранието кои, освен што ќе го поддржат бизнисот, ќе ја стимулираат и економската активност преку поддршка на инвестициите и преку зголемување на бројот на вработените. На тој начин, рече Заев ќе се делува кон забрзување на заздравувањето на економијата, а понатаму и кон забрзување на економскиот раст.

Просечната месечна нето-плата во 2020 година, согласно предвидувањата, забележа раст од 7,8%, кој произлегува од мерките преземени пред пандемијата, како што се владината мерка за финансиска поддршка на работодавците коишто извршија зголемување на платата до одреден износ, зголемените плати на вработените во јавниот сектор, како и дополнителното зголемување на платите во образованието и здравството во 2020 година“, рече премиерот Заев во интервју за ТВ канал 5.