Хрватска денеска бираше нов претседател на државата. Според првичните неофицијални резултати на хрватската Државна изборна комисија, на претседателските избори, од пребројани 28,59 отсто од гласовите, во водство е Зоран Милановиќ за кого гласале 32,02 отсто од избирачите.

Избирачките места вечерва беа затворени во 19 часот, а според првичните резултати најголем број гласови освоил кандидатот на Социјалдемократската партија (СДП), Зоран Милановиќ, додека за второто место се борат актуелната претседателка Колинда Грабар-Китаровиќ и независниот кандидат Мирослав Шкоро.

Според обработени 48,54 отсто од избирачките места, Милановиќ освоил 32,02 отсто од гласовите, Грабар-Китаровиќ – 27,76 отсто, а Шкоро 22,72 отсто.

Седмите претседателски избори од независноста на земјата се одржуваат во Хрватска и уште 47 држави, на вкупно 6.533 гласачки места. Три милиони и 855.000 гласачи имаат право да гласаат на хрватските претседателски избори дома и во странство. 

Претпладневната излезност денеска влеваше одреден оптимизам.

На изборите гласаа околу 100.000 гласачи повеќе отколку во исто време пред пет години кога се бираше шеф на државата, објави Државната изборна комисија.