Министерството за внатрешни работи информира дека управните служби при МВР на територијата на целата држава денеска за време на одржувањето на изборите ќе работат само за подигање лични карти.

Службата ќе работи во периодот од 7 до 19 часот, а со цел да им се овозможи на граѓаните, кои претходно поднеле барање, да си ги подигнат личните карти и да може да го остварат правото на глас.

Навреме и без проблеми почна гласањето на десеттите парламентарни избори на 3.480 избирачки места во шест изборни единици во земјата.

Право на глас имаат 1.814.263 граѓани кои ќе избираат меѓу 15 партии и коалиции, со вкупно 1.578 кандидати.

Поради заштитата во време на пандемијата, односно дистанца меѓу избирачите, за првпат гласањето ќе трае од 7 до 21 часот, наместо до 19 часот како што беше во сите досегашни изборни циклуси.