Миле Бошњаковски денеска на прес-конференција во Владата соопшти дека ова е негов последeн прес во својство на владин портпарол и дека заминува во Кабинетот на претседателот на државата Стево Пендаровски каде ќе ја извршува функцијата генерален секретар.

Ми беше чест две години да соработувам со сите вас новинари, сниматели и фоторепортери. Се надевам дека соработката ќе продолжи во наредниот период во една друга форма. Простете доколку имало некоја грешка оти таа грешка доколку постоела немало никакви интенции за тоа односно пристапот беше кон сите ист, рече Бошњаковски заблагодарувајќи се на довербата на премиерот и на колегите од тимот со кој, како што рече, досега направиле над 100 прес-конференции.

Миле Бошњаковски дипломирал на Филозофскиот Факултет при Универзитетот  „Св. Кирил и Методиј“ во Скопје, на Институтот за историја. 

Миле Бошњаковски професионалната кариера ја започнува како новинар подоцна уредник и водител во националната телевизија Канал 5 во 1999 година, а станува уредник и водител на централните вести на МРТВ јавниот сервис во 2002 година. Покрај телевизискиот ангажман Бошњаковски соработува со печатени медиуми, како и новински агенции во Македонија на надвор: Макфакс, неделник ЗУМ, неделник Форум итн.

Во 2004 година Бошњаковски се приклучува на тимот при Македонскиот Институт за Медиуми и ја презема улогата на тренинг координатор на проектот Едногодишна школа за новинари од која произлегува денеска акредитираната висикообразовна институција „Висока школа за новинарство и односи со јавност“.

Во 2006 година Миле Бошњаковски ја презема улогата на Директор на корпоративни комуникации во Т-Мобиле Македонија, сектор во чија одговорност влегува надворешната комуникација, интерната како и корпоративната одговорност на компанијата. Бошњаковски е единствениот македонски менаџер кој е дел од оперативниот тим во спроведување на процесот на ребрендирање од Мобимак во Т-Мобиле. Тој истовремено е редовен член на комуникацискиот директорски тим на Дојче Телеком, а има работено и на глобалната стратегија на компанијата за корпоративна одговорност.

Во 2010 година, Бошњаковски ја продолжува кариерата во Фондот за население на Обединетите Нации (УНФПА) и ја извршува функцијата на специјалист за застапување и комуникации. Во рамките на редовните активности покрива и програмски компоненти како што се демографија и население, младински политики, а истовремено поминува обуки за „Родово Трансформативни Програми“. Бошњаковски во УНФПА исто така бил дел од глобалниот меѓународен ростер (со локација во зградата на ООН во Њујорк) на тим на комуникатори кои интервенираат во услови на хуманитарни кризи насекаде низ светот.