Актуелниот претседател на ВМРО-ДПМНЕ, Христијан Мицкоски вечерва на 17-от редовен конгрес на партијата е реизбран за лидер на партијата.

Од присутни 493 делегати, гласале 492 од кои 489 за Мицкоски. Имало и три неважечки ливчиња.

„ВМРО-ДПМНЕ после овој Конгрес е со уште поголем елан и енергија за времињата што следат. Нашиот успех на локалните избори кажува дека доаѓаат промени во земјава. Народот има очекувања и надеж од нас и мораме да донесеме промени. Подгответе се, нè чека многу работа. Подготвен сум да разговарам со секој искрен политичар кој ќе застане зад она што треба да биде нов процес во државата“, рече Мицкоски во говорот по изборот за претседател на партијата.

Конгресот на ВМРО-ДПМНЕ се одржа под мотото „Нова генерација за нова иднина“ и на него беше усвоена т.н. Доктрина на партијата со 16 клучни точки за идното дејствување на партијата, која според партиските челници ќе ја донесе на власт.