Поранешниот македонски премиер Никола Груевски и понатаму е на мета на унгарските новинари кои непрестајно го следат неговото движење.

Бившиот премиер на Република Македонија и лидер на ВМРО ДПМНЕ, Никола Груевски, беше виден на прием на еден од бродовите на Дунав во Будимпешта. Новинарот Балаж Цеко објави фотографија на својот Твитер профил каде се гледа дека поранешниот премиер е во друштво со неколку мажи.

Како што пишуваат тамошните медиуми, Груевски во Будимпешта е сместен во познат и луксузен хотел во градот, излегува на прошетки, многу често џогира, има посети од блиски лица од Македонија и е во потрага по постојано живеалиште, надвор од хотелски објекти.

Поранешниот лидер на ВМРО-ДПМНЕ Никола Груевски, беше прогласен за виновен во случајот на Специјалното јавно обвинителство (СЈО) познат во јавноста како „Тенк“ кој се однесуваше на набавката на луксузниот блиндиран „мерцедес“ и осуден на две години затвор.

А додека пак поранешниот помошник министер во МВР Ѓоко Поповски, исто така беше прогласен за виновен и осуден на шест ипол години затвор.
Груевски беше обвинет за примање награда за противзаконско влијание, додека Поповски за злоупотреба на службената положба и овластувања.

На обвинителната клупа беше и поранешната министерка за внатрешни работи Гордана Јанкулоска, на која поради ризична бременост и беше раздвоена постапката, но сепак пред неколку месеци таа беше осудена на 4 годишна затворска казна.